Liebschti Elly
8 Jahr hend die beschti Tierschutzorganisation (NetAP – Network for Animal Protection) und de weltbeschti Chirurg (Nico Kipfer) dir gschenkt, wo du uf Elba bime Kastrationsiisatz gfunde worde bisch. Und ich bin so glücklich, dass ich dich han dörfe adoptiere und du euses Lebe um so villes schöner gmacht häsch. Ich glaub, keis Büsi isch je so verwöhnt worde wie du und ich wird dich niemals niemals niemals vergesse. Du bisch eini inere Million, mis chline Fägnäscht und Ranggifüdli. So vill Seich häsch im Chopf gha und ich han alles gliebt. Ich han alli mini Büsi über alles gliebt, aber du bisch i all dene ville Jahr das gsi, wo mir am allernächste gstande isch und ich weiss gar ned, wie ich mit dem Verluscht muess umgah, dass du nüme da bisch. Ich weiss, eines Tages chani ohni Träne und Schmerz im Herz a all die Moment zrugg denke und all dini Bilder aluege ohni dass ich muess brüele, aber jetz grad isch es ohni dich eifach dunkel und schwer.
Es tuet eus leid, dass du dini letscht Nacht ide Klinik häsch müesse verbringe. Aber de Nico hät so guet zu dir gluegt und ich bin sicher, du bisch ihm au uf Ewigkeite dankbar, dass er da gsi isch für dich. Ich bins uf jede Fall, und ich wirde niemals meh vergesse, was er alles für dich gmacht hät. Au ihm isch dis Schicksal näch gange und hät ihn berüehrt.
Ich lieb dich bis zum Mond und zrugg und ich weiss, dass ich dich wieder gseh irgendwenn uf de andere Siite. Bis dahi wird ich wieder lerne lache und s’Lebe gnüsse und ich weiss, es wär i dim Sinn, dass ich villne Tier no hilfe und das wird ich mache, ich versprichs dir. Mir gsehnd eus i eusne Träum, Zuckerbohne. So long!
Elly, gebore unbekannt (wahrschinli 2014) – 20.03.2025