Mir zwei händ zuenand gfunde churz nachdem du din letschte Mensch so plötzlich verlore häsch. Ach, wie leid du mir det tue häsch. Du häsch schliesslich grad de einzig Mensch verlore dem du vertraut häsch. Nur scho für das han ich dir dini verblibendi Zit so schön wie möglich welle mache.
Du häsch mich dänn au grosszügig i dinere Wohnig willkomme gheisse und, obwohl du Unbekannte gegenüber nie besonders zuetraulich gsi bisch, häsch mir scho churz druf abe dis volle Vertraue und es Plätzli i dim Herzli gschenkt.
So lang ich dich kennt han bisch du immer en ganz besonders bravi, sanfti, eleganti und wohlerzogeni Chatze-Dame gsi. Mit dinere liebevolle Art häsch du innert chürzischter Ziit mis Herz eroberet.
Ich bin dänn au sehr truurig gsi wo ich dich ha müesse gah lah, au wämmer nur zwei Jahr zäme gwohnt händ. Aber dafür wie du mich ufgnoh häsch, dass du mir dis Vertraue gschenkt häsch, dini liebevolli Art, wie oft du mich zum schmunzle bracht häsch und ganz generell für die gemeinsami Ziit, dafür wird ich immer dankbar si.
Dis Plätzli i mim Herze isch dir für immer sicher. Danke für alles du herzigi Pfuus-Muus.
PS: Ich hans immer gseit, aber jetzt no eis letschts Mal:
"So es bravs Miezeli wie dich, dass sötti jede ha"